மயிர் உதிர் காலம்

மயிரே போச்சு என்று திரிந்தவனே உன் மயிர்கள் உதிர்வதை பார்க்கிறாயா? கவலைப்படாதே, இது மயிர் உதிர் காலம், அவ்வளவு தான்.

திருட்டுத்தனமாய் வளர்த்த முடி; PT SIR, திட்டியும் திமிர் எடுத்து வளர்த்த முடி.

தலைவரை பார்த்து வளர்த்த முடி; தலைவி பார்ப்பதற்காகவே வளர்த்த முடி.

வேண்டியவர் இறப்பின் பொருட்டோ, வேண்டுதல் கணக்கின் பொருட்டோ கொடுப்பதற்கு எப்போதும் கைவசமாய் இருந்த முடி - இன்று, கையோடு கொத்து கொத்தாய் கொட்டுவதும் அதே முடி தான் - எந்த மயிரானால் என்ன, விடை பெற விரும்பினால் வருத்தமின்றி வழியனுப்பி வைப்பது தானே சரி, விடு; இது மயிர் உதிர் காலம், அவ்வளவு தான்.

இனி, தலையை சிலுப்பி சிலுப்பி கழுத்தை

சுளுக்கி கொள்ளும் வேதனை இல்லை.

“Bhaiya, normal cutting” என போராடி போராடி

புரிய வைக்கும் வேலையும் இல்லை.

சளிப்பிடிக்கும் தொல்லை இல்லை;

சனியன், செலவு செய்கிற இம்சையுமில்லை.

“சின்ன வெங்காயம் தேச்சுப் பாருங்களேன்” என்ற

சில்லறை அறிவுரைகள் சீக்கிரத்தில் நின்று போகும்;

“சின்ன வயசுல முடி எப்படி இருக்கும் தெரியுமா” என

பாஷாவாக பீத்திக்கொள்ள சத்தியமாய் வாய்ப்பு வரும்.

சாப்பாட்டில் முடி இருந்தால், இனி சந்தேகமின்றி

சண்டைக்கு செல்லலாம்; ஒருவேளை,

சண்டை முத்திப் போனால், தலை முடியால்

மாட்டித் தவிக்காமல் வெளியே வரலாம்.

செய்வினை செய்கிறவர்கள், ஐயோ பாவம்,

கொஞ்சம் கூடுதலாய் சிரமப்பட வேண்டியிருக்கும்.

சிரிக்க வைக்கும் உத்தமர் கூட்டம்

சில ஜோக்குகளை நம் பெயரில்

மொய் வைக்க ஆர்வமாய் காத்திருக்கும்; சிரித்துவிட்டு போகட்டும் விடு.

ஆனால், இனி தலை முடிக்குள் மாட்டிக் கொள்ளாமல்,

மழை, நேரடியாய் நம் தலையைத் தொடும்.

விடியற்காலையும் குளியற்வேளையும் உதிர்ந்த

முடி எதுவுமின்றி சுமூகமாய் நகரும் - அட,

தலைக்கவசம் கூட இனி தயக்கமின்றி அணியலாம்.

சொல்லப்போனால் அவள் தலை கோதி விடுகிற சுகம் தவிர,

சொல்லிக்கொள்ள இழப்பென்று பெரிதாய் ஒன்றுமே இல்லை.

விடு, இது மயிர் உதிர் காலம், அவ்வளவு தான்.

4/365